Türkmenistanyň dürli künjeklerinden gelen höwesjeň ýaşlaryň 50-ä golaýy Aşgabatda geçirilen «Robot-sumo» ýaryşyna gatnaşdy. Bu ýaryş «Kids Expo: ähli zat çagalar üçin» atly halkara sergi-ýarmarkasynyň jemleýji güni geçirildi.

«Türkmenistan: Altyn asyr» elektron neşiriniň habar bermegine görä, ýaryş şahsy görnüşde geçirildi: ýörite arenada her bir gatnaşyjy öz eli bilen ýasan robotyny hödürledi. Adaty ýapon sumo göreşi ýaly, her robotyň esasy maksady garşydaşyny arenadan çykarmak boldy. Bu tutluşyklarda ýaş konstruktorlaryň diňe tehniki başarnyklary däl-de, eýsem olaryň strategiki pikirleniş ukyby hem aýan boldy.

Ýaryşyň netijeleri boýunça ýeňijiler yglan edildi:

1-nji orun — Alihan Akgaýew, A. S. Puşkiniň adyny göterýän Türkmen-rus umumybilim berýän orta mekdebiň okuwçysy.
2-nji orun — Rozymyrat Ýagşymyradow, Aşgabat şäherindäki daşary ýurt dillerini çuňlaşdyryp öwredýän 13-nji orta mekdebiň okuwçysy.
3-nji orun — Aýhan Garýagdyýew, Aşgabat şäherindäki 18-nji orta mekdebiň okuwçysy.

Ýaryş Türkmenistanyň Söwda-senagat edarasy bilen «Döwrebap Maslahat» hususy kärhanasy tarapyndan bilelikde guraldy. Ýeňijiler we baýrakly orunlary eýelänler guramaçylar tarapyndan ýadygärlik sowgatlary bilen sylaglandy — diýip, çeşme belleýär.