Aşgabatda geçirilýän birleşdirilen forumda – XVIII Halkara «Türkmentel – 2025» sergisinde hem-de «Halkara ulag-üstaşyr geçelgeleri: özara arabaglanyşyk we ösüş – 2025» halkara sergisinde Arkadag şäheriniň pawiliony aýratyn orun eýeleýär.

«Türkmenistan: Altyn asyr» neşiri tarapyndan berilýän habara görä, Türkmenistanyň Prezidentiniň ýanyndaky Arkadag şäheriniň gurluşygy boýunça Döwlet komitetiniň maliýe-ykdysady bölüminiň müdiri Delfuza Şiriýewa şäheriň ikinji tapgyrynyň gurluşygynyň çäklerinde häzirki zaman tehnologiýalarynyň ornaşdyrylmagynyň meýilleşdirilýändigini aýtdy. Olaryň hatarynda akylly yşykly çyralary bolan akylly ýol hereketiniň ulgamy, akylly jaýlar, akylly hasaplagyçlar we jemagat ulgamlary, şeýle hem elektroawtobuslar we elektromobiller bilen üpjün ediljek awtobus duralgasy hem-de demir ýol menzili bar.

«Ähli gurluşyk işleri diňe milli kompaniýalar tarapyndan ýerine ýetirilýär, daşary ýurtlaryň gatnaşmagy diňe enjam üpjünçiligi bilen çäklenýär. Mysal üçin, koreýaly hyzmatdaşlar gurulýan desgalaryň tehnologik enjamlaşdyrylyş meselelerini çözmek bilen meşgullanar» — diýip, D.Şiriýewa nygtady.

Arkadag şäheriniň oýlanyşykly şäher infrastrukturasynyň halkara kadalaryna, şol sanda ekologiýa babatynda doly laýyk gelýändigi ilat üçin amatly we oňaýly ýaşaýyş gurşawyny üpjün edýär.