Türkmenistanda ITTC-2024 ulag-üstaşyr geçelgeleri boýunça iň uly halkara maslahat geçiriler
40 ýurtdan 600-den gowrak wekiliýet 2024-nji ýylyň 26-27-nji noýabrynda Aşgabatda «Halkara ulag-üstaşyr geçelgeleri: özara arabaglanyşyk we ösüş-2024» (ITTC-2024) atly 3-nji halkara maslahata we sergä gatnaşmak üçin ýygnanar. Wekiliýetleriň düzümine halkara we milli kompaniýalaryň, iri guramalaryň hem-de hökümet bölümleriniň wekilleri girer.
ITTC-2024 maslahaty Bütindünýä durnukly ulag gününiň çäklerinde geçiriler. Bu çäre Türkmenistanyň Ministrler Kabinetiniň ýanyndaky Ulag we kommunikasiýalar agentligi tarapyndan «Belli» hojalyk jemgyýeti bilen hyzmatdaşlykda guralýar.
Forumyň esasy mowzuklary ulag pudagynda zenanlaryň eýeleýän ornunyň artmagy, ulag düzümine durnukly tejribeleriň ornaşdyrylmagy, sanly ulgamyň logistika täsiri hem-de bilim, ulag toplumy üçin işgärleriň taýýarlanylmagy ýaly möhüm meseleler bolar. Merkezi Aziýa ýurtlarynyň dünýä bazarlaryna elýeterliligini ýokarlandyrmakda goldaw bermek strategiýalaryna aýratyn üns berler.
ITTC-2024 maslahaty hyzmatdaşlygyň we ulag infrastrukturasyna maýa goýumlarynyň geljegini ara alyp maslahatlaşmak, şeýle hem iri infrastruktura taslamalaryny durmuşa geçirmekde tejribe alyşmak üçin ajaýyp mümkinçilik döreder.