2-nji iýunda Tähran şäherinde Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew Ykdysady hyzmatdaşlyk guramasynyň (YHG) ulag ministrleriniň 13-nji mejlisine gatnaşdy.

Mejlise Eýran Yslam Respublikasynyň Ýol we şäher ösüşi ministri Farzane Sadeg, Özbegistan Respublikasynyň ulag ministri Ilhom Mahkamow, Pakistan Yslam Respublikasynyň aragatnaşyk ministri Abdul Alim Han, Halkara awtomobil ulaglary birleşiginiň (IRU) Baş sekretary Umberto de Pretto, Ykdysady hyzmatdaşlyk guramasynyň Baş sekretary Asad Majid Han gatnaşdylar.

Türkmenistanyň DIM-iniň habar bermegine görä, mejlisiň dowamynda sebitde durnukly we netijeli ulag ulgamynyň ösdürilmegine, Gündogar bilen Günbataryň arasyndaky logistiki arabaglanyşygyň güýçlendirilmegine, multimodal ugurlaryň giňeldilmegine we ulag ulgamynda sanly çözgütleriň ornaşdyrylmagyna aýratyn üns berildi.

Gatnaşyjylar ulag geçelgeleriniň döwrebaplaşdyrylmagy, serhet geçelgeleriniň awtomatlaşdyrylmagy, logistika merkezleriniň geçirijilik ukybynyň artdyrylmagy we innowasion tehnologiýalaryň giňden ulanylmagy bilen baglanyşykly meseleleri ara alyp maslahatlaşdylar. Sebitara arabaglanyşygyny we üstaşyr geçelgeleri güýçlendirmekde möhüm serişdeleriň biri hökmünde çykyş edýän YHG-nyň çäklerindäki hyzmatdaşlygyň ähmiýeti nygtaldy.

Türkmenistan ulag ulgamynda özara bähbitli hyzmatdaşlygy ösdürmäge ygrarlydygyny, şeýle hem Ýewropa bilen Aziýanyň arasynda möhüm ulag çatrygy hökmünde strategik ornuny tassyklady.

Mejlisiň çäklerinde birnäçe ikitaraplaýyn duşuşyklar geçirildi. Özbegistan Respublikasynyň ulag ministri bilen geçirilen duşuşygyň barşynda ulag-logistika düzümini ösdürmek, ýük daşamalarynyň möçberini artdyrmak, serhet geçelgelerini döwrebaplaşdyrmak we täze ugurlar boýunça hyzmatdaşlygyň mümkinçilikleri maslahatlaşyldy.

Pakistanyň aragatnaşyk ministri bilen ulag ulgamynda hyzmatdaşlygy giňeltmek, täze logistiki geçelgeleri döretmek we sanly tehnologiýalary ornaşdyrmak bilen bagly meselelere garaldy.

IRU-nyň baş sekretary bilen geçirilen duşuşykda sürüjileri we ulag menejerlerini taýýarlamak, hünärmenleriň taýýarlygyny ýokarlandyrmak we awtoulag ulgamyndaky hyzmatdaşlygy giňeltmek boýunça pikir alyşyldy.

Şeýle-de YHG-nyň baş sekretary Asad Madjid Han bilen duşuşyk geçirildi. Onuň dowamynda ulag pudagyny ösdürmegiň, sebitara baglanyşygy güýçlendirmegiň we halkara üstaşyr geçelgelerini ösdürmegiň möhüm ugurlary ara alnyp maslahatlaşyldy. Mundan başga-da, şu ýylyň 3 — 5-nji awgusty aralygynda Türkmenbaşy şäherinde geçiriljek BMG-niň Deňze çykalgasy bolmadyk ösüp barýan ýurtlar boýunça üçünji maslahatyna taýýarlyk görmek bilen baglanyşykly meselelere garaldy. Agzalan çäräniň çäklerinde YHG-nyň nobatdaky giňişleýin maslahatynyň geçirilmegi meýilleşdirilýär.