10-11-nji sentýabr aralygynda Aşgabatda geçirilen Türkmenistanyň Halkara maýa goýum forumynda (TIF-2024) «Türkmenaragatnaşyk» gullugynyň wekilleri birnäçe möhüm şertnamalary baglaşdylar we daşary ýurtly hyzmatdaşlary bilen gepleşikleri geçirdiler. Bu forum maýa goýum taslamalaryny ara alyp maslahatlaşmak we telekommunikasiýa we sanly tehnologiýalar ugry boýunça halkara hyzmatdaşlygyny ösdürmek üçin meýdança boldy – diýip, Türkmenportal saýtynyň habarçysy habar berýär.

Çäräniň dowamynda agentligiň wekilleri sanly ykdysadyýeti ösdürmegiň we innowasiýa tehnologiýalaryny ornaşdyrmagyň zerurlygy barada çykyş etdiler. Maglumat tehnologiýasy pudagynda hereket edýän kanunçylyk binýadyny halkara standartlaryna uýgunlaşdyrmagyň ähmiýetine aýratyn üns berildi.

Özara düşünişmek we hyzmatdaşlyk etmek hakynda şertnamalara gol çekilmegi forumyň möhüm netijesi boldy. Hususan-da, «Türkmenpoçta» poçta kompaniýasy Gyrgyzystanyň «Gyrgyz poçtasy» APJ bilen, «Turkmendomen» hojalyk jemgyýeti bolsa «European networks OÜ» kompaniýasy bilen şertnama baglaşdy.

Mundan başga-da, Türkmenistanyň telekommunikasiýa pudagynyň wekilleri öňdebaryjy daşary ýurt kompaniýalary bilen birnäçe ikitaraplaýyn duşuşyklary geçirdi. Bu duşuşyklarda tejribe alyşmak hem-de iň täze maglumat we sanly tehnologiýalary ulanmak pudagyndaky hyzmatdaşlygy ösdürmegiň geljegi ara alnyp maslahatlaşyldy.

Türkmenistanyň Halkara maýa goýum forumy sebitdäki innowasiýa we ýokary tehnologiýaly sebitleri ösdürmek üçin möhüm platforma hökmünde öz derejesini tassyklady. Bu bolsa telekommunikasiýa we sanlylaşdyrma pudagynda halkara gatnaşyklaryny berkitmäge ýardam etdi.